Wednesday, January 09, 2008

الدنيا بتضحك





هكذا وقفت أغني في الشارع أمام المتحف المصري على بعد خطوات من ميريت– البحر بيضحك ليه وأنا نازله ادلع املى القلل
ثم اكرر بانتشاء عبقري اه قلل قلل

كنا قد أنهينا لتونا ندوة جميله ثرية عن رواية " هامبرج" في دار ميريت للنشر ندوة عبقرية وتجمع جميل ومزاجي الرائق المحلق في سماء الحياة منذ أمس
أن يفوز المرء بجائزة إحساس لم أجربه من قبل .. حظي الاول أثق به دوما انا كائن سهل الإرضاء أشتري أول ما يناولي البائع يعجبني ويرضيني
وهكذا اتقدم لجائزة " أول مرة في حياتي" عدد القصص المقدمة للمسابقة 196 اتمتم بإيمان شديد يا ترى مين !
ثم أسمع اسمي من المهندس محمد الصاوي

لا اكتب جيدا عن السعادة ولا لحظاتها
لا أعرف أن امسك على لقطاتها فقط أعيشها أصرخ أبكي أدبدب في الارض لكني لا أصفها أخفق في تحويلها كلمات
لكني أتكور على بعضي في حضن من احب وأهمس أنا فرحانه أوي

تيت تيت عجوة
عجوة ده دبدوبي الجميل – لانه كان فرحان اوي ويستحق ان احمله على الاعناق واهتف به تيت تيت عجوة
الهتاف الذي ظل طيلة يومين بعد معرفتي بحصولي على المركز الأول لجائزة القصة القصيرة جدا من ساقيه الصاوي

أن تمنحني الكتابة أموال
هل انحني على يدها لأقبلها هل أضمها لصدري لتلتئم مع وجداني اكثر
بعد كل السعادة والجمال الذي تمنحه لي الكلمات تغرقني أكثر فتعطيني فلوس كمان!

البحر بيضحك ليه؟ اه قلل قلل
لا احب الشتاء لأني كائن صيفي فوضاوي مزعج كثير الضحك والكلام والكتابة والحركة والبكاء
لكني اليوم وقعت في هواه
كانت نسمات الشتاء الباردة المعبقة بالامل والسعادة والخير والحب تلامس بشرتي فأبتهج وأغني
المطر ورائحته والماء المرتفع جدا يذكرني بأمواج الاسكندرية التي اشتقتها فجأة
نازلة ادلع املى القلل
أنا الكائن الذي لم يطأ البحر بقدميه من قبل ولا قرر التحليق ابتعادا عن الارض
عندي فوبيا من الوقوف فوق السلالم والكراسي
لا أطمئن الا للأرض تلك الطيبة الجميله
ومع ذلك – البحر بيضحك والحياه بتضحك وأنا بضحك وفرحانه وبحب الشتا وبموت في الصيف
ومواربه شبابيك قلبي لنسايم بكرة
اللي أكيد احلى .



25 comments:

Amr Ibrahim said...

ألف مبروك يا بنوتة
كان نفسي أسجل مكالمتك ليا وانتي بتبلغيني
عياط على ضحك على زأططة
ربنا يسعدك دايما
وعقبال نوبل
وسلام مخصوص لعجوة :)

dr/dina said...

:))
انا فرحانه جدا والله و
فرحت اكتر
لما قريت البوست
ماانتي بتعرفي تفرحي و تهيصي اهه يا نهى
كنت باحكي لحد اعرفه عنك و عن الفرق بين الروايه الكئيبه الجميلة بتعتك دي و بينك
كنت بقوله لمل بسمع صوتها في التليفون بحس ان الدنيا كلها فرحانه

:)) يا رب تكوني فرحانه دايما ان شاء الله
و عقبال نوبل
:)
سلااااااام
دينا

شباب نفسه الناس تبقى سعيدة said...

ألف ألف مبروك يا أستاذة نهى
وإن شاء الله في تقدم على طول
وبجد مواضيعك تستحق التقدير والشكر
وكمان موسيقى عمر خيرت اللي بتسمعهيا
تحياتي

ست المرتفعات said...

مبروك يافندم
:)


علياء

Anonymous said...

وكأني أراك أمامي وأنت في الميدان تغني للبحر....وصفك حلو أوي للفرح ألف مبروك تاني مع إني أول واحدة لو راجعتي الرسايل في الجروب بتاعك
وعقبال نوبل
مي بهاء

كراكيب نـهـى مـحمود said...

احلى عمرو في الدنيا - ربنا يخليك ليا
تعر ف كنت بتنفض وانا بكلمك ومش عارفه اضحك ولا اعيط
بس فجاه كده حسيت اني عايزة اقول لماما وعايزة اسمع منها هيه بس مبروك
وانت عارف انك حد بيعمل لي حاله القرب دي مينفعش افرح غير معاكم
ربنا يسعدك انت كمان على قد قلبك الطيب ويخليك لينا يا ابو البنات
وعجوة بيسلم عليك جدا جدا

ديناااا0 طلبتيها ونولتيها اخيرا اخيرا كتبت لك تنطيط وفرح وبتاع
ربنا يسعدك ويفرح ايامك انتي كمان
شكرا على وجودك في دنيتي الصغيره ربنا يكرمك


نفسك الناس تبقى سعيدة - يا رب يا رب
شكرا لك ولك كل امنياتي الطيبة
الله يخليك

علياء الجميله - الله يبارك فيكي وشكرا ليكي جدا

اول بشائر السعادة مي - طبعا طبعا رسالتك وصلت بس معلش ككنت مروشة وفرحانه ومش عارفه اقول حاجة
شكرا ليكي على لك حاجة الله يخليكي

Anonymous said...

مبروك يا قمر
عقبى لنوبل
والله يا نهى فرحت لك من قلبي
ربنا يسعدك
افتكريني بقى بـ 53 قرش :)
و سندوتشين بطاطس محمرة من التابعي
:)
ملحوظة : حاسة كأني شفتك ف اللحظة دي
و سلامي لـعجوة
إيمان الميهي (شلال العطر)

Anonymous said...

الف مبروك يا نهى
بجد فرحتلك جداجدا
عجبنى احساسك بالفرح اوى زى احساسك بكل حاجه بتكتبيها وسلامى الجامد جدا لعجوه.
والبحر بيضحك ليـــه.

هييييييييه :-)

مدمن كتاباتك.
محمد من جده

يا مراكبي said...

ألف مبروك .. بجد بنحس إن إحنا اللي كسبنا الجايزة معاكي كمان

مبروك

حسام مراد said...

الف الف مبروك يا نهى
وعقبال كل الجوايز ان شاء الله

وربنا يسعك كمان وكمان

تقبلى ارق ىتحياتى وسلاماتى

شيماء زاهر said...

مبروووووووووك يا نهى

قشطات وفل وياسمين ...

mohamed kamal hassan said...

يا خبر

إزاى إتأخرت فى التهنئة كل ده

ألف ألف مبروك

لى عندك مورو

مبروك يا نهى هانم

((:

مصطفى الحسيني said...

صباح السكر
اذيك يا نهى
مبرررررررررررك
مبررررررررررررك
مبررررررررررررك
وعقبال الجايزه التانيه والتالته والألف


أنا متأسف ليكى جداا انى ما تابعتكيش فى الموضوع بتاع التدوينه الظروف كانت ملخبطه جدا
أنا معتمد على طيبتك انك ما تزعليش

حازم شلبى said...

ما أجمل أن يضحك البحر وان يتنتشى الشتاء فرحاً ... ما أجمل السعادة حين تعرف طريقها الى من نقدرهم و نعتز بهم ... تخفق الكلمات فى التعبير لكن يكفينى كل تلك السعادة التى تحملينها فى قلبك .. يكفينى أن عجوة أخيراً قد ضحك
مبروك .. للجائزة التى شرفت بكِ
مبروك للشتاء .. صديق جديد فى مملكته الباردة
مبروك لنا نحن أصدقائك و محبى قلمك الجميل .. نهى الجديدة السعيدة
تحياتى و تقديرى على الدوام

Anonymous said...

لما حد بيوصف السعادة اللي هو فيها
بيبان في الوصف ده طيبته او شره
محبته للحياه وللاخرين ولا حقده

وهنا اكتشف كم انت جميلة وطيبة وثمينةالقلب

مبروك وتهنئة قبل كل شئ علي نفسك الصافية
ومبروكة بك الجائزة

كراكيب نـهـى مـحمود said...

ايمان الجميله- الله يخليكي كانك كنتي موجوده فعلا متشكره اوي اوي وعقبالك انتي كمان ووحشتيني

محمد- اتبسط ان كتابتي عن الفرحه عجبتك لاني مش شاطرة فيها والله يبارك فيك كل امنياتي الطيبة لك

يا مراكبي- شكرا يا بشمهندس مش عارفه اقولك ايه بجد غير متشكرة وربنا يكرمك
تقديري ومودتي

حسام مراد- الله يخليك متشكرة جدا ولك مني كل المودة والتقدير

احلى شيماء زاهر في الدنيا- الله يبارك فيكي يا حبيبتي منتظراكي في ميريت يوم الاربع اوعي تنسي

صاحب اجمل تماثيل ملح في الدنيا محمد بيه كمال- الله يخليك انا فرحانه اوي ولك عندي مورو وكورونا فاكر!


الشاعر الجميل - مصطفى الحسيني انا ازعل منك ينفع برضه يا رب تكون الظروف بقت احسن عامه انا شلت لك نسخة معايا اي وقت اديهالك ان شاء الله
الله يبارك فيك مودتي .

صديقي الجميل - حازم شلبي
لا اعرف الا ان تترقق الدموع في عيني وابتهج اكثر وامتن لكلماتك الحانية
شكرا لك جد شكرا

المجهول- كل الكلام ده ليا انا
الله يكرمك - تقديري واحترامي والله يبارك فيك يا رب

باسم شرف said...

مبروك يا نهي

سندباد said...

تيت تيت ههههههه

صحيح بأغيب عنك بالشهور لكن لما بأجي كل مرة بآلاقي حاجة مميزة
أخر مرة حضرت وجدتك قد قفلت هذه المدونة الجميلة
وهذه المرة أجد هذا الخبر السعيد
أنت أصلا كائنة تعيش فقط لتكتب ما هو جميل و متميز

مليون مبروك يا نهى ويا رب تكون أول خطوة في مشوار أخره نوبل

عقبال الأعمال الجديدة
خلي بالك لازمني نسخة من كل عمل جديد
مش شغلي
:)

سنة (هجرية) سعيدة, تهانينا الخالصة وكل الأمنيات الطيبة

تيت تيت
:)

علي said...

الدنيا بتضحك !
دا عنوان ؟ معقول ؟!
سريعا التفت لاعلي المدونة ! لست مخطئا ! نعم هي نهي ! يا ربي ماذا حدث ؟
اقف علي حافة الاستسلام لنظرية شيماء – احبك و انت تعزي النكد زي عينيك – كما علقت علي تدوينة سابقة.
ابدأ القراءة – اسرع من المعتاد-
أشعر بالفرحة – علي غير المعتاد –
فازت بجائزة ....... افاجأ – كالمعتاد –
اتساءل منذ متي تذهب الجوائز في مصر لمن يستحقها !

"لا اكتب جيدا عن السعادة ولا لحظاتها" تدعين خجلا و يكذبك علي الفور التعبير الرائع "أتكور على بعضي في حضن من احب وأهمس أنا فرحانه أوي".

تعترفين بتهور في غمار الفرح انك ستحصلين علي اموال او ربما لعلمك اني في الكويت و لن اتقدم بطلب اقتراض !

انها الجائزة الاولي و الفرحة الاولي و لكن جوائز كثيرة قادمة و افراح اكثر في الطريق اكاد اراها.

مبروك يا نهي ..... انا فرحان أوي.

كراكيب نـهـى مـحمود said...

باسم- الله يبارك فيك
انتم السابقون يا فندم

صديقي الجميل سندباد- الذي يغيب ليعود كل مرة ومعه بشارات الاحلام
اللهي بارك فيك
لك عندي كل النسخ حاضر هتصرف
خلي بالك من نفسك ودايما بخير وسعادة يا رب


صديقنا الجميل - علي
انا مثلك تملأني الدهشة غريبه هي السعاده المطلقة على جهازي العصبي
انا اغني وارقص من 5ايام بلا توقف
اكاد اشعر ان جسدي وعقلي لا يحتملا تحليق روحي
تعرف انت كم السعادة جميله
افكر كيف ساكتب بوست فوق هذا ساحتفظ به قليلا االحياة بتضحك
عن القرض طارو ايا علي الجايزة الجايه بقى
شكرا لنبؤاتك وبشاراتك الطيبة
ياااه فرحان ايو علشاني انت جميل وطيب اوي
علي انا فرحانه اوي

teba said...

نهى
مبروك ...مبروك من كل قلبى
مفيش حد بيفوز فعلا الا اذا كان يستحق فوزة..و انت اكيد تستحقى كل دة

إبـراهيم ... معـايــا said...

ألف ألف مبرووووك يا نوهااا نوها ... نوها ، وياااارب السنـة دي عليكي أحلى وأجـمـل ، ونشوف روايتك التانية بقى
أنتِ تستحقين
جممممممممممممممم
معلش جي متأخر ، بسا عاتي بقى

MKSARAT SAYED SAAD said...

مبروووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك
يا نهى

إيمان said...

أتابعك ولكنى منذ زمان ولم أترك لك تعليق...فكنت أرى ان كل ما يمكن أقوله يتضائل بجانب كلماتك العبقرية

اما الان فليس صعبُا عليا أن أقول مليون مبروك عقبال كل الجوائز بصحبة ودفء أهلك وناسك وأحبائك

وكل سنة وانتى طيبة

تحياتى ومودتى

الطاهر شرقاوي said...

الف مبروك الجائزة يا نهى
شفتى ازاى الحياة بتصالحك بعد مكنتى هتقفلى المدونة
وبانتظار روايتك القادمة

 

كراكيب نهى محمود © 2008. Design By: SkinCorner