Monday, April 07, 2008

كمبيوتر وأشياء أخرى


كزوجة هجرها زوجها عشر سنوات بلا رسالة واحدة او عذر
فعلها الهارد معي – مرة ثانية
لكن هذه المرة تسببت لي في حالة غريبة أصبحت اخشى الاقتراب من الكمبيوتر والعمل عليه مباشرة
ضاعت مني صفحات كثيرة من الرواية الجديدة المرهقة اصلا في كتابتها ..
عدت لتسجيل الشغل في ورق ثم الكسل من كتابته على الكمبيوتر لكن لذلك قصة مؤثرة فعلا
..
بإبتسامة أخي العبقري طارق تلك التي أعرفها كإعلانات وزارة الصحة الجديدة المغايرة للحملة السابقة عن انفلونزا الطيور بضرورة لعب الاطفال في اماكن مغايرة لوجود البط والوز وكده
سألني – في حاجة مهمة على الكمبيوتر ؟
وفي محاولة أن ابدو هادئة كالعادة – لا يا حبيبي – شغلي كله بس –
يحاول أن يبدو عابثا وهو يخبرني انه كان يجرب-
كنت انتظر هذه الكلمة في الأمر دوما انه كان يجرب – يشدني من تفكيري ومحاولتي الهدوء
أصلي كنت بجرب برنامج ممكن يرجع كل حاجة على الهارد لما يتمسح
اعتدلت في جلستي وكأنني مهتمة ويعنيني ما يفعله
بجد.. كويس وبعدين
تزداد حماسته – تصوري مسحت هارد محمد صاحبي كله ورجعته
امممممممم يعني هترجع الهارد بتاعنا تاني؟
لأ أصل متعرفيش الهارد دخله كهربا وده عيب مينفعش معاه البرنامج ده
طب يا حبيبي ايه اللي دخله كهربا ما كان زي الفل
اقترب مني بحذر – يظن اني لا سمح الله ممكن اغضب أو اخنقه مثلا
ده اخويا ومش معقول اخنقه علشان لعب كالمعتاد وحرق الهارد
مهندس برضه ومن حقه يجرب – بصرف النظر انه مهندس نسيج
بس هوايته الكمبيوتر
هكذا يقولها لي في كل مرة يعمل مصيبة .. هيه دي شكرا
بعملك صيانة للجهاز .. احدث برامج.. تعرفي حد بينزل نسخة ويندز على الاقل مرتين في اليوم
افرح طبعا وابتهج وأكاد ان ازغرد وأنا احتضنه بتأثر ومفيش مانع أبكي كمان قبل ان أقبل قدمه
الله يخليك يا طارق عشت زخرا للبيت .
في الاسابيع الماضية كنت حزينة للاوراق التي ضاعت
استنذفت الوقت في تجميع الاجزاء كما كانت من مسودة ورق أو جهازي في العمل أو الإيميل
اخيرا بدأ كل شئ يعود لطبيعته واستعوضت الله فيما ضاع
اخي الصغير طارق شكرا ولا انسى ان اعرض طارق للبيع
عن مميزاته بينزل نسختين ويندز على اقل تقدير في اليوم الواحد
أي جهاز له علاقة بفيشة الكهربا يقدر تعامل معاه لتوصيله لمثواه الاخير
في نسخة تانية من طارق في الشقه اللي قدامنا- وليد ابن خالي - بس متخصص أكتر في ريسفير والتليفون والتليفزيون لو حد هياخد الاتنين في تخفيض ألحق العرض – طارق يتحدى الملل .

17 comments:

Anonymous said...

حمد الله على سلامة الهارد
فكرتيني بموقف حصل معايا
واتحرق الهارد اللي فيه رواية من احلى الحاجات اللي بحبها
بس الحمد لله كنت طابعها قبلها بفترة
ربنا ستر
والا كانت ضاعت

Mohamed Kamal Hassan said...

صباح الفل
قولى لطارق
إن اللى حرق الهارد إنه بينزل نسختين ويندوز ف اليوم

هوه فاكره سودانى

متزعليش
((:

fawest said...

طب عليا النعمه الراجل ده جدع

انقذ بقصد البشريه و الوسط الثقافى من معارك ادبيه كانت ستثار حول كتابك الجديد
ممكن نقول اخرها شويه

اه لو محمد ربيع كان عايش
كان باسوا من هنا ومن هنا

هذه شيمه العباقره يا نهى
طب العبد لله نزل وندوز 16 مره فى يوم
صحيح مش كل يوم
بس خادت فتره عقبال ما المعدل قل ووصلت لمستواه

الجانب الخفى من شعورى
كتر خيره انه زود شوقنا للروايه
مش مهم تعبك
ممكن يجى بفايده
تغيرى شويه ، تحذفى حبتين
ههههههههههههههااااااااااا
ربنا رزقنى بأربع اخوات بنات
مستعدين يبعونى و يحطوا حسنه علىّ
اصلهم مش شايفين مميزات والحمد لله

Anonymous said...

:)) men zaman ma2retsh 7aga keda
7ata ana eftekert enek hagarty elbeet bta3ko
ya3ny dah rad en elrewaya lesa aslan ma7`elsetsh
tayeb we ba3deen a2ra eh now ana?
tayeb matgebely gobran bta3y badal mana a3da keda

7amdellah 3ala el salama
miss u
salam

dina

بطوط حبوب said...

انا طارق بتنا فمش هعرف ارد

شيمـــــاء said...

هههههههههههههههه
وقال كنت ناوية اجيب الكمبيوتر بتاعى لطارق باشا
ههههههههههههههههههههههههه

رئـــــيسـة حزب الأحلام said...

السلام عليكم
ربنا يخلهولك

Unknown said...

لو ما كنتيش حظة موسيقى خلي بالك من عقلك بتاعت المبدع عمر خيرت كنت خيرت عقلك وسمعتهالك تاني



ربنا يصبرك يا بنتي
بس أنتي قولتي عرض واحد وعليه التاني هدية
طب وهتدفعي كام بقى علشان أخدهم


هههههههه
تحياتي
محمد علي

GlimmerMan said...

يا نهي .. ريقي نشف أقول Backup .. Backup .. Backup .. Backup .. Backup .. Backup ..
حتي لو طارق مش بيلعب البخت في الجهاز بتاعك .. حتي لو عندك أحسن جهاز في الدنيا .. CD writer ب 100 جنيه و السي دي الفاضية بجنيه واحد .. حتي لو الجهاز ولع .. شغلك و تعبك معاكي و علي كتفك بدل ما تدوري عليه.

ال Backup ده زي التأمين .. تدفعي فية وقت و فلوس لمدة 100 سنة و نفسك ما تحتاجيش له .. لكن يوم ماتحتاجية بيبقي يساوي وزنة ألماظ ..

خليها عادة حميدة .. Backup من الملفات المهمة + كل الموجود علي المحمول (نمر و صور ورسايل) ..

لكن والحال هكذا فقد وجب العزاء و ربنا يصبرك علي ..

مُزمُز said...

جمييييييل
هههههه

ربنا يحظك

وربنا يصبرك برضه

بتيجي عندي وللا لأ؟

:)

عين ضيقة said...

أنا مش مستعدة اشترى على فكرة وده لأنى بقوم بالدور اللى بيقوم بيه طارق عندك على فكرة
بس ده على دماغى انا بس


على فكرة الكتابة على الورق امتع الف مرة من الكمبيوتر

soha zaky said...

على فكرة من شاهدة على الاحداث اؤكد ان ابتسامة طارق فى مثل هذه المواقف تشبه الى حد كبير ابتسامة مسئولى وزارة الداخلية والصحة معا ،ـ فهو يؤكد على الامن والامان وكذلك كل شىء هايبقى تمام

ربنا يعينك يا نهى على الهارد ومن يوعدك وطول الوقت انه كله هايبقى تمام
ياطارق شكلك غيران من نهى ومش عايزها تكمل روايتها طب والنبى لا نلم من بعضنا ونجبلها واحد جديد ها واما نشوف بقى هاتعمل ايه

wael fekry said...

هو لو الهارد اتعمل ليه فورمات ممكن ترجع البيانات بنسبة 70% لكن لو كان دخل كهرباء زياده وحرق بردة الهارد فممكن تغيرى البورده لو كانت متوفره فى السوق وده شئى نادر او حيحتاج منك بحث كتير ولكن لو كانت المديا هيا الى ضربت وباظه فنصيحه انسى واستعوضى ربنا لان المديا هيا الجزء الى بيتخزن عليه كل حاجه
( ملحوظه انا مهندس كمبيوتر حقيقى مش هوايه )

محمد إبراهيم محروس said...

والله الكمبيوتر ساعات بيعمل حاجات تجيب شلل رباعي
وبري بري
ويجوز اسقربوط وكساح
بجد الورق كان نعمة
يا ريت الواحد يرجع يكتب ورق زي زمان
وشد حيلك واكتبي تاني
وربنا يبعد عنك الفيروسات
وخلافه
خالص تحياتي

يا مراكبي said...

أنا كنت هأقولك تعزلي من الشقة .. لكن مادام فيه حد تاني زيه يبقى لازم تعزلي من المنطقة كلها

دينا فهمي said...

ضحكتيني بجد مع إني حسة بيكي أوي وبحرقة الدم اللي كنتي فيها (:

ربنا يعوض عليكي

ياسر said...

نسختين
وندوز في اليوم
يا طارق دانا الويندوز بتاعي
من شهر 10_2007يعني
تقريبا 7شهور بس طبعا بيحدث
نفسة اول باول كل ما يحتاج تحديث
هههههههههه
تحياتي

 

كراكيب نهى محمود © 2008. Design By: SkinCorner