Friday, June 27, 2008

الجنة فيها زحليقة


لم يكن هناك شئ يستدعي ان أطلب اجازة
لكني مع ذلك كتبت طلب وحصلت على أجازة 4 أيام

ليس هناك شئ سوى رغبتي في كسر التكرار ..
أن استيقظ في ميعاد محدد وامارس نفس طقوس الصباح وأقطع نفس الطريق واذهب لمكتبي أو للمقهى
اختار الذهاب للجريدة مرورا بوسط البلد او لف الكرة الارضية والذهاب لشاطئ النهر الذي كثيرا ما اشتاقه في الصباحات الحزينة ثم العودة للعمل

الرغبة في عدم الذهاب للتكعيبة او لسوق الحميدية أو لكافتيريا النقابة
أو الالتقاء صدفة أو بميعاد بأحد الاصدقاء
الملل من حضور الندوات واقتسام فناجين القهوة ومتابعة الاخبار على شاشة الكمبيوتر
والتحديق في صفحة الفيس بوك او ملفات الكتابة
دخول المطبخ وعمل أكل سريع ... ترتيب الدولاب اي حاجة
العجلة في نشر الغسيل ... اللهاث
حتى التأني
كل شئ
الأيام التي شعرت فجأة انها بدت متشابهة وإن كانت غارقه في الإثارة والتغيير

هل جربت حتى الملل من التغيير

في البيت لم يكن هناك خطط محددة سوى الإلتئام
التوقف عن الجلوس على شاشة الكمبيوتر
الجلوس امام سكان البيت أكثر وقت متاح في طاقتي.
لإستيعاب ما يفكرون فيه وما يفعلونه .. دون التظاهر باني اسمع كما كنت أفعل الايام الماضية .
لأني أنهى كل طاقتي وأعود للبيت غير راغبة في شئ سوى الصمت والتلاشي.

كنت أحتاج ايضا للجلوس معي
لسد الثقوب التي تتسع في روحي بفعل الحزن والشجن

الحنين الذي فتح طاقاته كلها امامي
استجبت وتداعيت


أيام إجازتي الأريعه كانت مزدحمة بالبشر والأحداث
والحزن والفرح
بالتغيير والتكرار


أحب الأطفال
أتمنى أن يكون لي طفلة لا أمل من تلك الأمنية
كيف بدى ذلك الإحساس مسيطرا بجنون الفترة الأخيرة
كيف ينعكس فقدي لأمي وإحساسي الأبدي بالفقد
وارتعادي من الاتصالات الهاتفية الصباحية والليلية المتأخرة
أفكر في أخبار الموت

أرهب الوحشة وأظن أن إبتسامات الأطفال قد تفي بالغرض

من برنامج الاجازة كان استضافة طفلات عمي الثلاث
كنت أفكر أن أجرب الاعتناء بطفل

كيف أكتب عن ذلك !

أنا اعاني من أرق ولا أنام عادة إلا بعد الفجر بساعتين
البنات يجلسن ملتصقات بي يحكين ويضحكن ويغنين ويرقصن حتى .. أشعر برغبه في النوم بعد منتصف الليل بقليل
أظن أني بذلت مجهود كبير في يوم واحد
بلا ورق ولا كتابة ولا جرائد ولا وسط البلد

في المطبخ نلعب ونصنع البيتزا
وفي الحمام نرش على بعضنا الماء
وفي حجرتي يتظاهرن بترتيبها في حين أنهن يعثون فيها فسادا
على شفا الانهيار العصبي المضحك
اكتشفت ان الاطفال لا تتوقف عن الحديث أبدا
اكتشفت انهم يعيدون الحوارات على مدار اليوم .. وأن كل منهن تحب أن تحكي لي نفس الحكاية التي حكتها اختها لكن بلسانها هي
ما الذي كان يحدث لي ولجهازي العصبي

يتابعني أبي ويضحك عليّ
ويسألني بشماته من حين لآخر
" اتبسطي في الأجازة "
في الحقيقة – اتبسطت-
هل جربت ان تهرب من عالمك الكبير القبيح المرعب وسط امان الاطفال

في أول ايام الأجازة
توفت والدة صديق عزيز عليّ جدا
اعتصر الحزن قلبي .. أن تفقد امك مرة اخرى
كيف لازمتني ابتسامه والدته طيلة ايام الأجازة
تذكرت لقاءنا الأول .. تذكرت الكلمات الرقيقة الطيبة التي قالتها لمحمود عني
وتذكرت حتى انها اول من فكرت فيه في أول عيد أم مر عليّ بعد وفاة امي أذكر أني حدثتها وقتها ..
لم أعرف أن اتحدث مع محمود يوم وفاتها .. تكلمنا على الهاتف قبل سفره بساعه كنت اظن اني لن ابكي وأنا أعزيه
كنت اظن أني سأقول له كلام يشد من ازره ويقويه .. واخبره انها الآن في الجنة مع امي .. اظن ان أمي تحب مجالسه طنط يا محمود
هي بالفعل تحبها
أنا اذكر دموعك يوم وفاة امي .. وأنت لا تعرف كيف ارتديت ملابسي بعد مكالمة شيماء لي لتخبرني بخبر وفاة والدتك وأنزل للشارع أمشي هناك
أقف في ميدان طلعت حرب اشتكي لله
محمود أحزن كما تريد .. فلا شئ يعوض الأم ...

أصفف لحبيبة شعرها
وأعلم فرح لعب بنك الحظ – اشتريناها مخصوص لأجلهن
وأنا امسك كروتها واوراقها عدت طفلة تلعب مع أطفال لم يتبقى منهم سوي رجال وسيدات كبار لديهم بيوت واطفال الآن .
وأقبل حلا قدر ما تسع طاقتي أدغدغها وتضحك ويتسرب جزء من حزني .

أحاول ان احكي لهم فلا يمنحوني فرصة
يفسدون كل ما أحاول قوله لهن
يغيرون الأغاني على الكمبيوتر لأنهم لا يريدون سماع منير .. يحبون تامر حسني وغيره وأنا لا اعرف ان اسمع ذوقهم

أسأل حلا تعرفي الجنة ؟
تقول لي " الجنة بيدخلها الناس اللي مش بيكدبوا – وتنظر لي بطفولتها وجمالها
وتقول " عارفه الجنة فيها ايه ؟
وأنظر لها وتفاجئني بأن تقول بثقة وايمان و يقين هي التي لم تتعد الاعوام الثلاثة أن " الجنة فيها زحليقة كبيرة " هكذا تفتح يدها على سعتها وتقول كبيرة أوي

تدور حولي وانا اشرب فنجان قهوتي
تقولي لي – تشربي قهوة زي بابتي – تقصد والدها – عمي
أضحك واقول ايوا تقول عارفه انا بحب القهوة سبيلي حبة
اخبرها أنها سادة وأني لن أعطيها منها
تقول لي بحبها من غير سكر زي بابتي عارفه بحب أشم ريحتها في الفنجان هاتي كده وتضع أنفها في الفنجان وتغمض عينها وتقول الله
اترك الفنجان أخذها في حضني أقبل يدها وأقول
أنتي كده صاحبة مزاج كمان
لا تعرف ما الذي أعنيه لكنها تقول هاتي لسحه
وتقصد لحسة من البن على طرف الفنجان أعطيها لسحة
وأشرب احلى فنجان قهوة

إجازتي هذه الأيام
كانت كالحياة غارقة في الشجن والبهجة وتستحق أن نحياها .


23 comments:

lotto 649 said...

Whoever owns this blog, I would like to say that he has a great idea of choosing a topic.

lottery winning numbers said...

I'm thankful with your blog it is very useful to me.

سهــى زكــى said...

على فكرة يا كركوبة
مقلتش ان من اهم استمتاعك بالاجازة وجودى انا ونهنوه وسلوى وحبيبة ، بالزمة مش كنا خفاف خفاف !!!!
ايه اعترضى ، كنا عايزينك تحسى بالاجازة الجميلة
ومتهيألة نجحنا ولا أيه
عموما يا نونو ، انت شخص بيقدر يجس بالحياة ومبهجة وبتدى امل عظيم لكل اللى حواليك
والاجازة انا بحسدك بجد انك قدرتى تاخديها
يابختك
نفسى اخد يومين بس
وانشألله يقعد معايا الحتة كلها انا موافقة بس أأجز
عموما عودا احمد

شيمـــــاء said...

منك لله يا شيخة
والله حرامى عليكى بجد

Anonymous said...

صدق المثل القائل ناس فى الاجازة هايصة
وناس فى القسم لايصة
أحمد مجاهد

قهوة بالفانيليا - شيماء علي said...

هى يا صاحبتي
حاولي انك تحسي بروح الهدوء في الاجازة ..
كمية الوجع هنا كبيرة اوي ..
حاذري يا نهى
حاذري
عارفة ان الوجع بيبقى غصب عننا
و افرحي ..
افرحي بالحاجات البسيطة ..
بفنجان القهوة مع البنت الجميلة .. اللي عارفة ان الجنة فيها زحليقة كبيرة اوي :)
الله يعينك يا نهى و ييسر لكِ ما تجدين

blue-wave said...

حلو اوى الجو اللى عشتيه فى الأيام الأربعه دى
بجد يابختك

ست المرتفعات said...

الله

تسـنيم said...

حلوين صح

الأطفال يعني :)

أحباب الله بجد... هو احنا ليه كبرنا ومفضلناش زيهم أكبر همنا الزحليقة اللي في الجنة؟؟

ٍSOU said...

ياسلام لما تهربى من الدنيا كلها فى ابتسامة طفل
ولا لما تصحى م النوم تلاقى طفل بيجرى على سريرك و يطلعة و يديكى بوسة و بس ولما تغسلى وشك تلاقية لاوى بوزة عليكى و لو قلتيلى تعالى يا حبيبى بقولك بالفم المليان
لآ
اصل هو دة اللى عشتة الاسبوع اللى فات
:))

الفراغ said...

سلام عليكم
اكتر حاجه نفسى فيها انى ارجع ام لاطفال

صغار شوقتيينى العب مع حبيبه وفرح وخصوصا حلا بس انامافهمتش مين اللى كبر وبقوا رجاله وستات كبار وعندهم اطفال
المواضيع دخلت فى بعضها
ربنا يسعد ايامك
انا برضه باخد احيانا اجازه اعتيادى
بس علشان انام بدل الصحيان من الساعه 6 الصبح والجرى فى المواصلات
روحى المره الجايه زوريهم واحكيلنا عملتى ايه
سلام

dodda said...

ربنا يرزقك ببنوته حلوه...

اجازتك فرحتنى والبنات حلوين اوى
وريحة الفهوه تجنن

...
والبقاء لله فى والدة محمود ربنا يرحمها وكل اموات المسلمين برحته الواسعه

Anonymous said...

البوست ده فيه حاجة غريبة؟
هي ايه بقى؟؟؟



دينا

محمد سلامة said...

يا بختك
أنا بقى مش عارف أخد و لو يوم واحد , ألأوغاد منعوا الأجازات طوال شهر 6 و 7 و ده عشان الزفت تقفيل الميزانية
صدقيني أنا مش بحسدك
أنا بس بحقد عليكي
و عزائي لابن أبويا و أمي أدم و حوا أخويا الإنسان محمود
و لكِ خالص حقدي
أخ , أسف جداً
قصدي خالص مودتي

fawest said...

يا بختك عرفتى تستمتعى بالاجازه حتى مع ذكر الموت الى حولتيها_ أقصد صغارك- ال زحاليق ومراجيح فى الجنه

الاسبوع اللى خته أجازه معرفتش أفلفس من وسط البلد والنت و الحميديه

باباكى- على وزن بابتى- طبعا زعلان عشان مقدياها لعب وريحتى من الكتابه وسنينها السودا

لكن دا أكيد هيجدد خلايا مخك و يخليكى أنشط فى الشغل

تصدقى بفكر أعمل رحله ليوم واحد الى الفيوم مثلا
كلمتك فى الفكره دى وناوى أنفذها بجد
كلنا هنستمتع بالاجازه مره واحده

هيه
هيه

أميرة غجرية said...

معنديش غير تعليق واحد.. وهو مشابه للي عمو قالوهولك .. عجبتك الاجازة يا نونا؟!!!!!!!!!!!! (-:

كراكيب نـهـى مـحمود said...

lotto
thanks for your pass
and iam also so thankful

سهى - انتم كنتم قص شريط الاجازة بس
وبما ان الرحلات تظهر من بداياتها
كان لازم اعرف ان هوه ده اتجاه رياح هذه الاجازة
لكن برضة كان يوم لطيف اوي وفعلا نورتوني

مشمش- اممم
معلش هي الحياة كده

احمد - طب ايه ادعيلك تاخد اجازة زيها ماشي يا احمد

كراكيب نـهـى مـحمود said...

قهوة بالفانيليا - شيماء علي
يقول لي اصدقائي ان كتاباتي تحمل وجع مع اني شخصية مرحلة ارد " عندي شيزوفرينا"
انا اكذب في هذا الرد
لكني في الكتابة لا احتاج لاقنعة ولا لا نتزاع ضحكة هنا اقف حافية الروح

بلو ويف- شكرا لك

ست المرتفعات- اتكسفت جدا تسلم زيارتك

تسنيم- حلوين اوي اه
بس اتعلمت كمان اني في حاجات تانية كتير جميلة برضه
ومين قال ان همنا مش الزحليقة
كل واحد له زحليقته

كراكيب نـهـى مـحمود said...

سو- كل ما تقولينه ناعم وممتع ومبهج تماما
شكرا لمرورك

الفراغ- عليكم السلام
الاطفال من اجمل الحاجات في الدنيا
الي كبروا هما الاطفال اللي من جيلي وكنت بلعب معاهم اسفه لو كنت لخبطك
الزيارة الجاية لما انسى اللي حصل لي المرة دي
محبتي

دودووو- الله عليكي شكرا ليكي ولكي مني كل الامنيات الطيبة زيك

دينا- ياااه
اترعبت لما قريت تعليقك
البوست ده في ثقل وشجن ساكن الروح مش عارفه تطير منه

كراكيب نـهـى مـحمود said...

محمد سلامه - عادي يعني الجردهيخلص وهتاخد اجازة وهحسدك اي خدمة

فاوست - هيه هيه دي بتاعتي
هيهههههههه
الفيوم مش ده نفس البلد اللي انا اقترحته لما قلت لي
اه بابا زعلان اني مشتغلتش في الاجازة
وانا فرحانه انك قضيت الاجازة في وسط البلد
شفت الشر صباح الفل يا طه

أميرة غجرية - اتبسطت اتبسطت يعني

ahmed said...

نهي
كنت عايز اقري البوست بدون تعليق ،
لانك فتحتي عليا فتحة حزن ما يعلم بيها الا ربنا ،وبعدين فكرت اني لازم أقول لك يمكن الاجازة الجاية تبقي سعيدة ، يمكن بكرة يبقي أحسن ، يمكن اللي راح يرجع ، وأفكرك بمقطع لبدر شاكر السياب بيقول فيه : كل الذين أحبهم رحلوا
فلماذا لا أحب المبغضين ،
فلربما رحلوا
وعاد الذين أحبهم .
تحياتي لك ، وما تقطعيش اتصالاتك

كراكيب نـهـى مـحمود said...

احمد
اسفة لو كنت وجعت قلبك
غريبة منتبهتش ان الاجازة كانت حزينة غير لما قلت لي دلوقت
يا رب الاجازة الجاية تكون سعيدة
هيههههه
اتفاجئت فعلا
شكرا لك على كلمات السياب
وطبعا ان شاء الله مش هقطع الاتصالات

Anonymous said...

الله عليكى يانهى.

عجبتنى اجازتك جدا
وعصرتى قلبى بحكايتك عن والده محمود ربنا يرحمها ويرحم اموات المسلمين.

اشتقت لكراكيبك وكلامك المنمق.

سلامى لبنات عمك اللى حببتينى فيهم.

اخيرا عايز اقولك انتى عبقريه بتجددك فى كل حاجه بتكتبيها.

مدمن كتاباتك.
محمد من جده

 

كراكيب نهى محمود © 2008. Design By: SkinCorner